Bahan Pagelaran Seni Budaya Sunda Kelas 8

Dina semester dua ieu, Pagelaran Seni Budaya Sunda SMPHT pikeun Kelas 8 nyaeta  "Ngagalantangkeun Sajak", insya Allah dilaksanakeun dinten rebo, kaping 9 mei 2012 tabuh 12.40-15.00 (no absen 1-16) sareng kaping 16 mei 2012 tabuh 12.40-15.00 (no absen 17-31) .  Nu dinilaina : anggoan (kostum),kawantun (keberanian),soanten (suara) jeung hapalan. Hidep tiasa milih salah sahiji sajak dihandap!

CIPASUNG

Ku :  Acep Zamzam Noor

Ciibun na tonggong daun

Hiliwir angin ngusapan pipi kemang

Sésa hujan peuting ngagenclang di buruan

Lembur kulawu dipulas halimun ipis

Dalingdingna hawa gunung, jungjunan

Nungtun lengkah mulang ka pangkonan salira

Di tonggoh pasir ngémploh kénéh

Kiara jeung tanjung can muguran deui

Upama langit angkeub lebah tutugan mangsa

Buntelan méga bedah ku geter katrésna

Kuring sujud jeung sumegruk, jungjunan

Ngamparkeun cimata sapanjang lemah kadeudeuh

BANDUNG

Ku :  Eddy D Iskandar

Mun seug nataan jalan

Dipati Ukur Sulanjana Ranggamaléla

Wastukancana Siliwangi Pajajaran

Loba kenéh ngaran-ngaran karuhun

Nu kalindih ku nu lian

Mun seug nataan papan réklame

China Town, Pizza Hut, Sukiyaki

McDonald, Kentucky, Hoka-Hoka Bento

Ngaran urang mah nyalingkir

Kapipir-pipir

Mun seug nataan pangulinan taya tegal nu lega

Taya alun-alun nu liuh

Taya Cikapundung nu canémbrang hérang

Taya jalan titincakan

………..

Nyawang ka hareup

Naha aya kénéh tatapakan

Mun ngawujud jadi mégacity?

MAPAG PEUTING KAAGUNGAN

Ku: Dedi Kusmayadi

Wanci Peuting nugeus simpé
Kuring nyaring najan awak rada cape
Duméh hayang sugan jeung sugan
Panggih peuting Kaagungan sarébu bulan

Kuring bungah anu taya bandingna
Sakur nikmat anu sakitu lobana
Hirup berkah reujeung taat
Muga tepi ka ahérat

Peuting ieu muga jadi panghampura
Tina sagala dosa
Jadi pangraksa
Tina seuneu naraka 

NINEUNG

Ku : ABAH AHSA

Mun tepung jeung boboran shiam sok ngarakacak cimata
pipi kuring baseuh disimbeuhan cimata
ninggal tatanggi mulih ka lembur menta hampura ka kolotna
tur menta du`a keur ngalakonan hirup saba`da shiam

Pipi kuring baseuh disimbeuhan cimata
ngadangu rerencangan mulih ka lembur mere karesep kolot
ngabagjakeun nu di lemburna

Hapunten kuring tacan tiasa mulang tarima
hapunten teu tiasa nepangan ……….

Nun Gusti hapunteun dosa pun biang sareng pun bapa
mugi ngahapunten sagala kalepatan ibadah tur hirupna
tampi amal saena ……….